АҚШ президенти Доналд Трампнинг БМТ Бош Ассамблеясидаги нутқи Венесуэла раҳбариятининг норозилигига сабаб бўлди, деб ёзмоқда Guardian нашри.
Душанба куни БМТ минбарида сўзга чиққан Венесуэла ташқи ишлар вазири Хорхе Арреаса АҚШ президенти ўзини бутун дунёга ҳоким сифатида кўрсатишга уринаётганини таъкидлади. Унинг сўзлари Доналд Трамп томонидан Венесуэлага қарши янги санкциялар пакети имзоланганидан бир кун ўтиб Бош Ассамблеяда янграган.
«Гўё дунё императори бўлиб, Доналд Трамп тинчлик мақсадида ўрнатилган бу минбардан урушлар ва аъзо мамлакатларни йўқ қилишини эълон қилиш учун фойдаланди. Ташкилотнинг суверен аъзолари устидан мутлақ, буйруқ берувчи ҳокимиятга эга бўлган каби мажбурлов чоралари ва қўрқитиш билан ўзича баҳо беришга уринди», – деб айтган венесуэлалик дипломат ўз нутқида.
Ўтган ҳафтада Бош Ассамблеяда сўзга чиққан Доналд Трамп Венесуэла ҳукуматини кескин танқид қилган эди. Бундан ташқари, Оқ уй раҳбари АҚШ ва унинг иттифоқчиларини ҳимоя қилиш учун Шимолий Кореяни йўқ қилиб ташлашини ҳам маълум қилган. АҚШ президентини ўзини яккаҳоким каби тутишини танқид қилиш билан чекланмасдан, Хорхе Арреаса Венесуэла АҚШ билан мулоқот қилиш учун очиқлигини ҳам қайд этган. Венесуэла президенти Николас Мадуро эса АҚШ раҳбарини «янги Гитлер» деб атаган.
Венесуэлада бир неча ойдан бери давом этаётган сиёсий инқироз ва ҳукуматга қарши намойишлар туфайли Николас Мадуро ҳукумати халқаро ҳамжамият босими остида қолган. Венесуэла Олий суди март ойида мухолифат етакчилик қилаётган парламентни тарқатиб юбориши ортидан, мамлакатда янги сайловлар бўлиб ўтган. Парламент сайловида Мадуро партияси ғалаба қозоқнган. Шундан сўнг, мухолиф партия раҳбарлари бирин-кетин ҳибсга олинган.
Сиёсий инқироз, инфляция, ишсизлик ва истеъмоол товарлари етишмаслиги ўн минглаб венесуэлаликларни мамлакатни тарк этишга мажбур қилган. Якшанба куни Доналд Трамп Венесуэланинг бир қатор юқори даражали амалдорларига нисбатан санкция қўллаш ҳақидаги қарорни имзолаган. Қарорга мувофиқ, «қора рўйхат»га киритилган амалдорлар ва уларнинг оила аъзолари АҚШга киритилмайди.