Индонезия фуқаролари “иккинчи хотин” топишга кўмаклашувчи электрон иловадан норозилигини изҳор қилди. Бу ҳақда The Independent нашри хабар қилмоқда.
Аҳолисининг асосий қисми мусулмонлардан иборат бўлган Индонезияда кўпхотинлик қонуний саналади, аммо эркак иккинчи турмуш учун биринчи хотинидан розилик олиши ва суднинг рухсатига эга бўлиши лозим. Индонезиялик эркак тўрттагача уйланиши мумкин. Аммо маҳаллий фаолллар эркаклар ушбу рухсатномани қалбакилаштираётганлигини айтмоқда.
AyoPoligami хизматини Линду Пранаяма (Lindu Pranayama) исмли муаллиф ишлаб чиққан. Электрон илова 50 минг мартадан ортиқ юклаб олинган. Аммо эркакларнинг кўпчилиги ноқонуний равишда иккинчи хотин излаётгани маълум бўлиб қолди. Дастурчи илованинг янги версиясини қатъий қоидалар асосида тайёрлашга ваъда бермоқда. Унда фойдаланувчининг идентификацион карточкаси, оилавий аҳволи ҳақида маълумот ва хотини/хотинларининг ёзма тасдиғи бўлади.
Иловани Play Marketдан юклаб олиш мумкин. Эслатиб ўтамиз: Индонезия дунёда мусулмонлар сони энг кўп мамлакат саналади.