Тошкент шаҳрида автомобилларнинг энг юқори тезлиги сезиларли равишда чекланиши мумкин

11.03.2018 | Ўзбекистон | 2887

Тошкент шаҳар Ички ишлар бош бошқармаси аҳоли пунктларидаги кўчаларда тезликни чегаралаш бўйича дунё тажрибасини таҳлил қилмоқда. Бу ҳақда Ўзбекистон Республикаси Ички ишлар вазирининг ўринбосари — Тошкент шаҳар Ички ишлар бош бошқармаси бошлиғи Рустам Жўраев оммавий ахборот воситалари вакиллари билан биринчи очиқ телемулоқоти чоғида айтиб ўтди. 

Ҳозирда Ўзбекистон аҳоли пунктларида максимал тезлик 70 км/соатни ташкил қилади. Дунёнинг йирик шаҳарларида эса бу кўрсаткич 50-60 км/соатдан иборат. Рустам Жўраевнинг фикрича, ҳозирда дунёда автомобилларнинг максимал тезлиги 70 км/соат бўлган шаҳарлар саноқли қолган. 

«Халқаро тажрибани ўрганганимизда шу маълум бўлдики, Европанинг 29 давлатида максимал тезлик 50 км/соатни, Лондонда 48 км/соатни, МДҲ давлатлари, хусусан Россия, Қозоғистон, Грузия, Арманистон ва Озарбойжонда 60 км/соатни ташкил қилади.

Ҳозирча биз бу масалани ўз ваколатимиз доирасида кўриб чиқяпмиз. Кейинчалик вазирликка ва ички ишлар вазирига таклиф киритмоқчимиз»- деди Жўраев.

«Ўйлайманки, бу йўналишда биз халқаро тажрибани ўрганиш орқали бу масала устида ишлаймиз, ҳозирча фақат таҳлилий ишлар олиб борилаяпти», — деди у.