Украина пойтахти Киев шаҳрида россиялик журналист Путиннинг ашаддий танқидчиси Аркадий Бабченкони ўлдириб кетишди. Айни вақтда Киев полицияси қасддан содир этилган қотиллик иши бўйича суртиштирув ишларини олиб бормоқда.
Хабарларга кўра, сешанба куни кечқурун Аркадий дўкондан қайтаётган маҳал, ўз квартираси остонасида отиб кетилган. Журналистнинг орқасидан бир неча маротаба ўқ узишган.
Украина Олий радаси депутати Антон Геращенкога кўра — ҳодиса сабабларидан бири россиялик махсус хизматларнинг ҳаракатлари бўлиши мумкин.
Украина ИИВ гумондорнинг фотосуратини эълон қилган. Бу 40-45 ёшлардаги, соқолига оқ тушган, тим кўк рангдаги бейсболка кийган эркак. Унинг бўйи 175-180 сантиметрни ташкил қилади, гавда тузилиши ўртача, қорни бор, деб аниқлик киритилган хабарда. Эркак жинси куртка ва жинси шимда бўлган.
Полиция вакилининг сўзларига кўра, Бабченкога қарата ўқ узган шахснинг яна бир нечта шериклари бўлган. Бабченконинг қўшниси, қотил глушительдан фойдаланган бўлиши мумкин, деган фикрни билдирган. Аёлнинг айтишича, у отилган ўқ овозларини эшитмаган.