Ўзбекистон мактаблари ва тиббиёт муассасаларида мутахассислар етишмовчилиги кўзга ташланмоқда. Бу ҳақда Олий Мажлиснинг пайшанба кунги 15-ялпи йиғилишида юқори палата раҳбари Ниғматилла Йўлдошев фикр билдирди.
Ҳар ой таркибида сенатор ва депутатлар бўлган ҳудудий комиссиялар мамлакатнинг 14 туманига ташриф буюрадилар. Туман мактабларидаги аҳвол ўрганилганида рус тили, математика, информатика, физика, кимё, биология, география, қонунчилик ва бошқа муҳим фанлар бўйича педагоглар етишмаслиги аниқланди.
Ўзбекистоннинг умумтаълим мактабларида қонун талабларига зид равишда 66,6 минг нафар ўрта махсус маълумотли ўқитувчилар ишлаб келмоқда. Шу билан бирга, Халқ таълими вазирлигининг бўлинмалари томонидан олий маълумот олишни хоҳловчи ўқитувчилар учун сунъий тўсиқлар яратилиши каби ҳолатлар ҳам бор.
Сенат раиси мисол келтирди. Андижон вилояти Шаҳрихон туманида истиқомат қилувчи Охунова Андижон давлат университети махсус сиртқи бўлимига ҳужжат топширмоқчи бўлганида асоссиз равишда унинг ҳужжатлари қабул қилинмагани сабабли Сенатга мурожаат қилди. Текшириш давомида вилоят халқ таълими бўлими Охунованинг номзоди ҳақида нотўғри маълумот бергани сабабли у ўқишга қабул қилинмагани маълум бўлди. Сенатнинг аралашувидан кейингина қабул қилинди.
Ниғматилла Йўлдошевнинг таъкидлашича, ҳар бир туманда 150−200 нафар тор ва умумий амалиёт шифокорларига эҳтиёж бор.
Йўлдошев оналар ва болалар ўлими даражасининг юқори эканидан хавотир билдирди. Йил бошидан бери 59 нафар она ва 2267 нафар бола ҳалок бўлди. Сурхондарё, Жиззах, Хоразм, Тошкент вилоятларида, Қорақалпоғистон ва Тошкентда оналар ўлими сони кўпайган. Болалар ўлимининг Қашқадарё (31) ва Сурхондарё (52) вилоятларида ўсиб бораётгани ташвишга солмоқда, дея таъкидлади сенат раиси.
Ниғматилла Йўлдошев турли сабабларга кўра узоқ вақт мобайнида чет элда бўлган фуқароларнинг тўлиқ тиббий кўрикдан ўтмаётганини таъкидлади. Жорий йилнинг биринчи чорагида ўтказилган тиббий текширувлар натижасида 162 киши ОИВ, 105 киши сил, 48 киши тери-таносил, 6284 киши бошқа касалликларга учрагани аниқланган.
«Текширувдан ўтмаётган бошқа фуқароларда бундай касалликлар аниқланмайди деб ким кафолат беради?» — дея савол берди сенатор.