20 ноябрь куни Россия президенти Владимир Путин йил якунларига бағишланган анъанавий матбуот конференциясини ўтказмоқда. Тадбир мамлакат иқтисодиёти жойида депсиниб, президентнинг обрўси тобора тушиб кетаётган пайтга тўғри келди.

Телевидение орқали жонли намойиш этилаётган матбуот конференциясини Путин иқтисод аҳволини ижобий тавсифлашдан бошлади. Унинг фикрича, 2018 йилда ишсизлик камайиб, Россиянинг ялпи ички маҳсулоти (ЯИМ) ўсиб бормоқда.

У иқтисодиётни жадал ривожлантириш, яшаш шароитини яхшилаш сингари аввалги даъватларини такрорлаб, Россияга “янги технологик пойдевор” зарурлиги, “ресурсларини бир жойга жамлаб”, улардан самарали фойдаланиш кераклигини уқтирди.

Путин ЯИМ ўсиши яқин орада 2 фоиздан ошиши кутилмаётган шароитда қандай қилиб жадал иқтисодий ривожланишга эришиш мумкинлиги ҳақидаги саволга жавоб берар экан, бунинг учун айрим ташқи омилларни айбдор қилиб кўрсатди. Олдинроқ собиқ молия вазири Алексей Кудрин Россия иқтисодиёти аҳволини “турғунлик” деб атаган эди.

Путин Россия ҳам ҳажм, ҳам сифат жиҳатидан “янги иқтисодий лига”га ёриб кириши кераклиги, “юксак мақсадлар бўлмаса, ҳеч нарсага эришиб бўлмаслиги”ни айтди.

Кремль Путиннинг 14-матбуот конференциясида 1702 нафар журналист иштирок этаётганини ва бу рекорд кўрсаткич эканини хабар қилди.