Ўзбекистонда 1 мартдан махсус “инвестиция визаси” жорий этилади, деб келтирилган Шавкат Мирзиёевнинг ЎзА порталида эълон қилинган “Фаол инвестициялар ва ижтимоий ривожланиш йили”да амалга оширишга оид Давлат дастурида.

Давлат дастуридан маълум бўладики, 2019 йил 1 мартдан бошлаб:

- хорижий инвестициялар иштирокидаги корхоналарнинг таъсисчилари (иштирокчилари) ва уларнинг оила аъзолари учун муддатини мамлакатдан чиқмасдан узайтириш имконияти бўлган, амал қилиш муддати уч йилни ташкил қиладиган “инвестиция визаси” жорий этилади;

- Ўзбекистонда корхоналар ташкил қилиш учун 3 миллион АҚШ долларидан ортиқ миқдорда инвестиция киритган хорижий давлатлар фуқароларига Ўзбекистонда яшаш гувоҳномаси 10 йил муддатга соддалаштирилган тартибда берилади;

- Ўзбекистонда яшаш гувоҳномаси ёки “инвестиция визаси”га эга хорижий инвесторлар ҳамда уларнинг оила аъзолари Ўзбекистон фуқаролари учун назарда тутилган шартларда тиббий ва таълим хизматларидан фойдаланиш ҳуқуқига эга бўлади.

Аввалроқ Тошкентда 2019 йилда 2,7 миллиард доллар инвестиция жалб қилиш кўзда тутилгани ҳақида хабар бергандик.