Россиянинг «Аэрофлот» ҳаво йўллари компанияси парвоз учун ноқулай об-ҳаво шароити кузатилаётгани туфайли 26-27 январь куни режалаштирилган, деярли, барча рейсларни бекор қилишга мажбур бўлди. Бу ҳақда компания ахборот хизмати хабар тарқатган. 

Маълум қилинишича, компания 26 ва 27 январь куни амалга оширилиши режалаштирилган парвозлар жадвалига тегишли ўзгартишлар киритган. 

«Парвозлар бўйича йўловчиларга қўшимча маълумотлар ахборот ва банд этиш марказида тарқатилади. Рўйхатдан ўтиш учун келган барча йўловчилар компания стандартлари ва федераль авиация қоидалари бўйича барча нарсалар билан таъминланади», – дейилади хабарда. 

Шунингдек, Москвадаги ноқулай об-ҳаво шароити туфайли Uzbekistan Airways компанияси ҳам ушбу йўналишдаги парвозлар жадвалини ўзгартирган. 

«Москвада об-ҳавонинг ўзгариши ва шаҳарда тинимсиз қор ёғиши туфайли ушбу йўналиш бўйича парвозлар жадвалини компаниядан билишингиз мумкин. Компания юзага келган ноқулайлик учун узр сўрайди», – дейилади ахборотда. 

Маълумот учун, Uzbekistan Airways компанияси парвозлари жадвали тўғрисида маълумот олиш учун + 998 78 140 02 00 телефон рақами билан боғланиш мумкин.