Ўзбекистонда 2019−2021 йилларда аҳолига эндокринологик ёрдам кўрсатишни такомиллаштириш бўйича миллий дастурни қабул қилиш режалаштирилмоқда. Бу жамоатчилик муҳокамаси учун эълон қилинган президент қарорида кўзда тутилган.
Соҳадаги асосий муаммолар қаторида қандли диабет касаллиги, айниқса унинг оғир шаклларига чалинган беморлар сонининг ортаётгани, диабетдан олдинги ҳолат барвақт диагностика қилинмаслиги, ҳудудий тиббиёт муассасаларида эндокринология бўйича малакали мутахассисларнинг етишмаслиги санаб ўтилган.
Ҳужжат билан қандли диабет профилактикасини тубдан яхшилаш ва аҳолини огоҳлантирувчи тадбирлар билан қамраб олиш режалаштирилмоқда. Жумладан, қуйидаги тадбирларни амалга ошириш кўзда тутилмоқда:
- Қандли диабетга чалиниш хавфи остидаги 45 ёшдан ошган шахслар ҳамда 24−28 ҳафталик ҳомиладор аёллар ўртасида қандли диабет скринингини ўтказиш;
- қандли диабетга чалинган беморларнинг онлайн-рўйхатини шакллантириш;
- ҳудудий эндрокринологик диспансерларни, жумладан гликирланган гемоглабин ва қалқонсимон без гормонларини аниқлаш учун зарур реактивлар билан узлуксиз таъминлаш йўли билан эндокринологик касалликларни диагностика қилиш усулларини жорий этиш.
- Ҳужжатда 1-тип қандли диабет хасталигига чалинган болалар ва ўсмирларни инсулин (инсулинли шприц-ручка) ва ўзини-ўзи назорат қилиш воситалари билан таъминлаш таклиф этилмоқда.
Болалар, ўсмирлар, эмизикли ва ҳомиладор аёлларни йод сақловчи дори воситалари билан таъминлаш режалаштирилмоқда.
Лойиҳа муҳокамаси 1 мартда якунига етади.