Тошкент шаҳар ИИББ матбуот хизматининг хабар қилишича, 13-март куни соат 22.50 да ички ишлар органларига 37 ёшли Аъзамжон Ш. дан хабар келиб тушди. Унга кўра, номаълум шахс унинг Чилонзор тумани Фарход кўчасида қолдирилган Lacetti русумли автомобилини олиб қочган. Жабрланувчининг сўзига қараганда, машина калити автомобиль ичида қолдирилган.

Хабарда қайд этилишича, Учтепа тумани ППХ ходимлари томонидан кўрилган чоралар натижасида, соат 23.10 да қидирувга эълон қилинган автомобиль ва гумонланувчи Учтепа тумани 12-кварталда топилганлар. Ҳайдовчи тўхташ ҳақидаги талабларига бўйсинмасдан, ҳаракатни давом эттириб яширинишга уринган. Аммо, шунга қарамасдан машина тўхтатилиб, гумонланувчи – Тошкент вилоятида яшовчи 33 ёшли Бауржан Ю. қўлга олинди.

Ҳозирда ушбу факт бўйича Ўзбекистон ЖКнинг 267-моддаси 1-қисми (“Транспорт воситасини олиб қочиш”) билан жиноий иш қўзғатилди.

Эслатиб ўтамиз, аввалроқ Тошкентда машинадан белигача ташқарига чиқиб, уни бошқарган ҳайдовчи маъмурий жавобгарликка тортилгани ҳақида хабар қилинган эди.