Перунинг собиқ президенти Алан Гарсия ўз жонига қасд қилди. Чоршанба куни полиция коррупцияда гумонланган сиёсатчини яшаб турган уйида ҳибсга олишга уринган. Шу пайт 69 ёшли Гарсия бошига қарата ўқ узган. Зудлик билан касалхонага етказилганига қарамай, собиқ президент ҳаётини сақлаб қолишнинг имкони бўлмаган.

Гарсия тарафдорлари сиёсатчи келтирилган касалхона олдида йиғилганлар. Унинг ўлганини эшитган оломон жунбушга келиб, полиция қуршовини ёриб ўтаёзган.

Алан Гарсия Перуга икки марта - 1985 йилдан 1990 йилгача ҳамда 2006 йилдан 2011 йилгача президент бўлган.

У иккинчи президентлик муддатида Перу пойтахти Лимада метро қурилиши бўйича шартномани қўлга киритишда кўмаклашгани учун пора олганликда айбланган.

Иддаоларга кўра, Гарсия Бразилиянинг товламачиликни бўйнига олган Odebrecht қурилиш ширкати билан тил бириктирган. Собиқ президентнинг ўзи бу айбловларнинг барчасини рад этган.