Андижонда ички ишлар ходими машинасида велосипедчини уриб юбориб, унинг ўлимига сабабчи бўлди

18.04.2019 | Ўзбекистон | 4997

Андижон вилоятининг Избоскан туманида ички ишлар ходими иштирокида йўл-транспорт ҳодисаси содир бўлди. Оқибатда 1 киши ҳаётдан бевақт кўз юмди. Бу ҳақда «Дарё» нашри хабар бермоқда.

ЙТҲ 15 апрель куни соат 23:00 ларда Избоскан тумани Оқ олтин маҳалласи ҳудудидан ўтувчи Пойтуғ—Куйганёр автомобиль йўлининг 3-километрида содир бўлган. Андижон туман ИИБ терроризм ва экстремизмга қарши кураш бўлими тезкор вакили, катта лейтенант А.А. хизмат вақтида ҳушёр ҳолатда ўзига бириктирилган давлат белгиси 60 429 VSF бўлган Damas автомашинасини бошқариб кетаётганда йўлнинг қатнов қисмида ётган велосипедчини уриб юборган. 29 ёшли ички ишлар ходими содир этган ЙТҲ оқибатида Д.Ш. оғир тан жароҳати олиб шифохонага ётқизилган. Тиббиёт ходимлари томонидан кўрсатилган биринчи ёрдамга қарамасдан 3 боланинг отаси ҳисобланган 43 ёшли Д.Ш. шифохонада вафот этган.

Мазкур ҳолат юзасидан 266-модда 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши) билан жиноят иши очилган. Ушбу модда бўйича айбдор деб топилган шахс 7 йилгача озодликдан маҳрум этилиши мумкин. Ҳозирда терговолди суриштирув ишлари олиб борилмоқда.