Ўзбекистонда «Росатом» лойиҳаси асосидаги биринчи атом электр станцияси қуриладиган жой келишилган. Бу ҳақда Россия ташқи ишлар вазири Сергей Лавров маълум қилди.
«АЭС қуриладиган майдонча борасида келишишга муваффақ бўлинди», — деди вазир, лекин АЭС учун танланган жойни маълум қилмади. Унинг сўзларига кўра, яқин вақт ичида «Росатом» ва «Ўзатом» ўртасида навбатдаги маслаҳатлашувлар бўлиб ўтади.
Аввалроқ Ўзбекистондаги биринчи АЭС Жиззах ёки Навоий вилоятида қурилиши мумкинлиги ҳақида хабар берилган эди. Унинг қурилиши тахминан 11 миллиард долларга баҳоланмоқда, бироқ аниқ суммаси ҳали ҳам эълон қилинганича йўқ.