Саида Мирзиёева аҳолини энг кўп ташвишга солаётган муаммоларни санаб ўтди

16.05.2019 | Ўзбекистон | 5947

Ўзбекистон ахборот ва оммавий коммуникациялар агентлиги директори ўринбосари Саида Мирзиёева ижтимоий тармоқлар фойдаланувчилари билан мулоқотининг илк якунларини сарҳисоб қилди.

«Аввалги постда ёш авлодни миллий қадриятлар ва инсонпарварлик руҳида баркамол этиб тарбиялаш бўйича Президентимиз томонидан илгари сурилган 5 ташаббусни амалга оширишда мактабларнинг ўрнини муҳокама қилдик.

Билдирилган изоҳларга кўра, сизни энг кўп ташвишга солаётган муаммолар қуйидагилар:

  1. Қишлоқлардаги мактабларнинг аҳволи қониқарсизлиги
  2. Ўқувчилар ва ўқитувчиларнинг мажбурий меҳнатга жалб этилиши
  3. Малакали ўқитувчилар етарли эмаслиги ва уларнинг ҳисобот тўлдириш билан овора экани
  4. Ҳар бир боланинг индивидуал иқтидорини ривожлантирувчи фанларнинг етарли эмаслиги
  5. Компьютер синфлари ва интернет билан боғлиқ муаммолар

Дарсларда уяли телефонлардан фойдаланиш, мактаб кийими, ўқувчиларнинг ҳуқуқий саводхонлиги ва бепул футбол майдонларига оид масалалар ҳам тилга олинди.

Энг долзарб масалаларни аниқлашда берган ёрдамингиз учун барчангизга катта раҳмат. Тегишли вазирликлар ушбу вазифаларни ҳал этишни бошлаган.

Шу ўринда, жамият учун муҳим бўлган бундай масалалар ечимини топиш маълум вақт, ресурслар, экспертлар муҳокамаси, зарур ҳужжатлар тайёрлаш ва албатта ҳар биримиздан тиришқоқлик ва бироз ташаббус талаб этишини таъкидламоқчиман», — деб ёзди Саида Мирзиёева Facebook’даги саҳифасида.

Маълумот учун, Саида Мирзиёева 12 апрель куни Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги директори ўринбосари этиб тайинланган эди.