Британиянинг Bell Pottinger пиар-компанияси “Ал-Қоида”ни салбий образда ифодалагани учун АҚШ Мудофаа вазирлигидан 500 млн доллардан ортиқ пул олган, деб хабар бермоқда Американинг Daily Beast портали.
2007 йилнинг май ойидан 2011 йилнинг декабригача Bell Pottinger “ахборий ва психологик амалиётлари” учун Пентагондан 540 млн доллар олган.
Компаниянинг собиқ ходими видеомуҳаррир Мартин Уэллс айтишича, жангарилар амалга оширган теракт оқибатларини тасвирга олиш учун пиарчилар съёмкалаш гуруҳларини жўнатган, сўнгра янгиликларга ушбу фрагментларни жойлаган. Унга араб тилида овозли йўлаклар қўшилган ва маҳаллий телеканалларга юборилган.
Мартин Уэллснинг сўзларига кўра, унинг компаниясига “Ал-Қоида”нинг қалбаки ташвиқот роликларини ишлаш вазифаси қўйилган. Компакт дискларга ёзилган роликлар 10 дақиқадан ошмаслиги лозим бўлган. Сўнгра Американинг денгиз пиёдалари антитеррористик рейд ўтказилган жойларга компакт-дискларни ташлаб келганлигини Уэллс айтиб берди.
“Улар бирор материални қидириб уйларни тинтиб, барчасини ағдар-тўнтар қилиш вақтида тасодифан компакт-дискни тушириб қўйган”, деб изоҳ берди Уэллс.
Bell Pottingerнинг собиқ ходими ҳамкасблари билан АҚШнинг Бағдоддаги ҳарбий базасида ишлаганини сўзлаб берди. Маълум бўлишича унинг фирмаси Пентагон, МРБ ва АҚШнинг миллий хавфсизлик Кенгашига ўз иши тўғрисида маълумот бериб турган.
Daily Beast порталида ёзилишича, Пентагон Ироқда Британиянинг пиар компанияси билан ҳамкорлик қилганини тасдиқлади.