Жанубий Кореянинг мухолифатдаги учта партияси томонидан президент Пак Кин Ҳенинг истеъфоси бўйича импичмент тайёрланган. Бу ҳақида Reuters агентлиги хабар бермоқда.
Импичмент учун мурожаатга парламрнтдаги 300 нафар депутатлар орасидан 117 киши имзо чеккан. 6 ҳафтадан буён давом этаётган сиёсий инқирозлар Пак Кин Ҳени мамлакатнинг ҳокимиятдан четлатилган илк демократик президенти бўлиши эҳтимолини оширмоқда.
Парламентга тақдим этилган ҳужжатда Пак Кин Ҳе томонидан ўз ваколатини суиистеъмол қилган ҳолда конституция ва жиноят кодекси қўпол тарзда бузилгани қайд этилган. Парламентда президентнинг истеъфоси масаласи 9 декабрь куни кўриб чиқилиши кутилмоқда. Истеъфо амалга ошиши учун депутатларнинг камида учдан икки қисми уни ёқлаб овоз бериши лозим.
Мухолиф партиялар томонидан импичментнинг қўллаб-қувватланиши га шубҳа йўқ. Аммо бунинг ўзи камлик қилади. Қарор қабул қилиниши учун президентнинг Сенури партиясидан сайланган яна 28 нафар депутат уни ёқлаб овоз бериши керак бўлади. Айни пайтда улар импичментни қўллаб-қувватлайдими-йўқми, номаълумлигича қолмоқда.
Жанубий Кореяда президентнинг дугонаси Чой Сун Шил билан боғлиқ можаролар октябрь ойининг охирида бошланган эди. Чой Сун Шилга нисбатан молияваий фирибгарлик, дугонасининг мансабидан фойдаланиш, давлат ишларига аралашиш ва президентнинг нутқларига ўзгартириш киритиш каби айбловлар қўйилган. Кетма-кет олти ҳафта давомида дам олиш кунлари Сеул кўчалари президентнинг истеъфосинин талаб қилган намойишчилар билан тўлган.