2016 йилда Ўзбекистон бўйича қайд этилган никоҳлар ва ажримлар сони бўйича Давлат статистика қўмитаси маълумотларни чоп этди. Унда келтирилишича, ўтган йилда республикадаги ФҲДЁ органлари томонидан 275,1 мингта никоҳ қайд этилган бўлса, 29,4 мингта никоҳ бекор қилинган.
 
Никоҳ қайд этилиш кўрсаткичининг пасайиши  Ўзбекистоннинг барча ҳудудларида деярли бир хилда бўлиб, Қашқадарё, Наманган, Андижон, Хоразм, Сурхондарё вилоятлари ва Қорақалпоғистон Республикасида сезиларли даражада камайган.
 
Республикамизнинг Жиззах, Сирдарё, Хоразм вилоятларида ўтган йилга нисбатан ажримлар сони ўсиши кузатилган. Статистик маълумотлар Бухоро, Навоий, Тошкент вилоятлари ва Тошкент шаҳрида эса аксинча, ажримлар сони камайган.
 
Шу ўринда таъкидлаш жоизки, Ўзбекистон Республикаси Президенти Шавкат Мирзиёев мамлакатимизда ажримлар сонини камайтиришга, яъни оилаларни сақлаб қолишга жиддий эътибор қаратган.
 
2016 йил 9 ойи якунига кўра, Тошкент шаҳрида тузилган оилаларнинг 32 фоизи ажрашиш даражасига етиб борган. Бу кўрсаткич республиканинг бошқа ҳудудларида, хусусан, Қорақалпоғистон Республикасида 8 фоиз, Хоразмда 6 фоиз, Сурхондарёда 9 фоиз, Қашқадарёда 10 фоиз, Бухорода 12 фоиз, Жиззахда 14 фоизни ташкил этмоқда. Статистик маълумотлар шуни кўрсатмоқдаки, оилавий ажримлар оқибатида асосан аёллар ва болалар жабр кўради.
 
Ҳозирда Тошкент шаҳрида 505 та маҳалла бўлиб, уларнинг ҳар бирида Яраштирув комиссиялари фаолият олиб бормоқда.  Ана шу комиссиялар фаолияти самараси ўлароқ 2016 йилда 1012 та оила суд залида яраштирилган, 1361 та вояга етмаган бола тирик етимликдан сақлаб қолинган.