Чеченистон президенти Рамазон Қодиров “Инстаграм”даги муштарийларидан мамлакатда ишлаб чиқариладиган янги тактик автовездеходга ном топишни илтимос қилди, деб ёзмоқда carzone.uz.

Феврал ойида “Чеченавто” заводи уч ўринли автовездеход — багги ишлаб чиқаришни бошлайди. Ундан ташқари, спортча авторусум ишлаб чиқариш ҳам кўзда тутилган.

Қодиров ўтган гал махсус операция кучлари Халқаро ўқув маркази жамоаси билан биргаликда шахсан ўзи баггини синаб кўрганини эслади. “Вездеход – ватанимизда ишлаб чиқарилган, тактик-техникавий кўрсаткичлари бўйича хорижликларникидан қолишмайдиган янги маҳсулот”, — деди Чеченистон президенти. Багги ўтиш қийин бўлган ҳудудларда йўлсиз шароитда шахсий таркибни олиб юришга мўлжалланган.

Рамазон Қодиров муштарийларидан машинага ном ўйлаб топишни сўради. Энг яхши ном ўйлаб топган муштарий машинани биринчи синаб кўриш ва экстремал автотайёргарлик курсини ўташ имконини қўлга киритади.

Баггининг жанговар варианти кўп вазифали бўлиши айтилмоқда. У йўловчи, юк, йўловчи-юк ташувчи, санитар-эвакуацион, зарбдор турларда бўлади. Спортча варианти йўлсиз жойларда жадал ва равон ҳаракатланади.

Багги узунлиги 4 м, вазни бир ярим тоннага яқин. Олтитагача ҳарбий хизматчини ва 800 кг юкни таший олади. Энг юқори тезлиги соатига 130 км. Баггининг қурол-яроғлари қаторига “Корд” ва “Печенег” пулемёти ҳамда АГС автоматик гранатомёти киради. Бундан ташқари дрон учириш мосламаси ёки ярадорларни ташувчи замбил ўрнатилиши мумкин.