Америкалик тарихчилар АҚШ президентлари рейтингида Барак Обамани 12-ўринга жойлаштирди, деб ёзади «РИА Новости». У Вудро Вильсондан кейинги ўринга жойлаштирилган. Биринчи учликка Авраам Линкольн, Жорж Вашингтон ва Франклин Рузвельт киритилган.

Рейтингни тузадиган C-SPAN телеканали маълумотларига кўра, Обама ўзини энг яхши намоён қила олган соҳа — иқтисодий бошқарув бўлиб, ушбу йўналиш бўйича у саккизинчи ўринни банд этди. Оқ уй собиқ раҳбари энг ёмон кўрсаткичларни конгресс билан муносабат (39-ўрин) ва халқаро алоқалар (24-ўрин) соҳаларида кўрсатган.

Рейтинг АҚШ етакчилари аутсайдерлари сифатида Жеймс Бьюкенен, Эндрю Жонсон ва Франклин Пирсни қайд этган.

Обамадан аввалги президент Жорж Буш кичик 43 нафар президентлар орасида 33-ўринга муносиб кўрилган. Тарихчиларнинг фикрича, Буш кичик ўзини халқаро муносабатларда жуда ёмон намоён этган. 

Рейтингни тузишда Американинг етакчи университетларидан 91 нафар тарихчи ва бошқа мутахассислар қатнашди. Улар президентларни жамоатчиликни ишонтира олиш қобилияти, инқироз даврида бошқариш, иқтисодий бошқарув, хулқ бўйича обрўси каби ўнта кўрсаткич бўйича баҳолади.