Turkish Airlines самолёти парвози вақтида кутилмаган воқеа содир бўлди, дея хабар бермоқда Guardian нашри.
Гвинея пойтахти Конакри шаҳридан Буркина-Фасо пойтахти Уагадугу шаҳри сари йўлга отланган Нафи Диабини парвоз вақтида тўлғоқ тутган. Аёлнинг ҳомиласи 28 ҳафталик (7 ойлик) пайтида туғилган бўлишига қарамасдан, соғлом эканлиги айтилмоқда.
Ер сатҳидан 12,800 метр баландликда туғилган чақалоққа Кадижу деб исм берилгани хабар қилинган. Аёлга фарзандини дунёга келтиришда йўловчилар ва экипаж аъзолари ёрдам беришган. Боинг 737 лайнери Уагадугу аэропортига қўнгач, аёл ва унинг чақалоғи шифохонага етказилган. Ҳозирда она ва боланинг саломатлиги жойида эканлиги хабар қилинган.
Кўплаб авиакомпаниялар ҳомиласи 36 ҳафтага тўлган аёлларга самолётда парвоз қилишга рухсат беришмайди. Айрим компаниялар эса 28 ҳафталик ҳомиласи бўлган аёлларга тиббиёт ходими рухсати бўлган тақдирда учишга имкон беришади.