Россиянинг Томск областида яшовчи пенсионер Виктор Смирягин 1 апрелдан нафақасига қўшилган устама 60 рублни мамлакат бош вазири Дмитрий Медведевга эҳсон сифатида жўнатди. Устама миқдоридан ғазабланган пенсионер ҳукуматга жўнатган мактубида “Қишлоқдан пойтахтга эҳсон” (сўзма-сўз “Село - столице – похмелиться”) қўшиб қўйган. Унинг айтишича, 60 рублни жўнатиш учун 133 рубл тўлаган. Турли баҳоналар билан бундай пул ўтказмасини қабул қилмасликка уринишган.
"Ва ниҳоят, пенсионерлар апрел ойидаги устамаларга ҳам етиб келдик, билишимча, фақат нафақанинг суғурта қисми оширилган, бу билан кимларнидир 7, яна бошқаларни 9, 11, 17, ҳаттоки, 40 ва 50 рублгача хурсанд қилишган”, — дейилади хатда. “Мен хафа бўлмасам ҳам бўлаверади, чунки менинг нафақамга 58 рубл 99 копейка қўшишган”, — деб киноя билан қўшиб қўйган.
“Улар бизни ҳар тарафлама хароб қиляпти, шунинг учун бугун почтага бордим-да, Дмитрий Анатольевич Медведев номига роппа-роса 60 рублни жўнатдим”, деб тушунтирди томсклик қария. “Очиқдан-очиқ, бутун дунёнинг кўз ўнгида устимиздан кулишяпти, чунки биз ғиқ этмаймиз, бу вақтда улар миллион ва миллиардларни ўмаришяпти, мисоллар росаям кўп, аммо уларнинг ҳеч бири этап бўлиб Магаданга бораётгани йўқ. Улар мамлакатни қай аҳволга солишганини ўз кўзлари билан кўриши керак эди”, деб ёзади Смирягин.
Пенсионер “устамаларни” бош вазирга жўнатишга даъват қилиб, шу йўл билан ҳукумат эътиборини қаратмоқчи бўлган.
Маълумот учун, жорий йилнинг 1 апрелидан РФда нафақа қиймати балли 0,38% — 78 рубл 58 копейкага оширилган. Пенсия ҳам шу миқдорда ошган. Нафақалар 2017 йилнинг 1 февралида — 5,4% реал инфляция ҳажмида оширилган эди. Аввалига ҳукумат нафақа жамғармасини — 5,8% га оширилишини режалаштирган бўлиб, қолганини апрел ойидан қўшмоқчи эди. Апрелдан россияликларнинг ижтимоий нафақаси 1,5% га ошди.
“Миллион ва миллиардларни ўмараётганлар”ни эслатиши билан Смирягин коррупция билан курашиш жамғармасининг шов-шувли текшируви натижаларига шаъма қилаётган бўлиши мумкин.
Шу йилнинг 2 март куни мазкур жамғарма етакчиси Алексей Навалний мамлакат бош вазири Дмитрий Медведевнинг махфий салтанати тўғрисида “У сизга Димон эмас” номли фильм эълон қилган. Фильмда бош вазирнинг қимматбаҳо кўчмас мулклари, яхтаси, агромажмуаси борлиги айтилган.
Навалнийнинг филми 26 март куни Россиянинг 80дан ортиқ шаҳрида коррупцияга қарши улкан митинглар бошланишига туртки берди.