Чехия футбол терма жамоаси ва Туркиянинг «Газиантепспор» жамоаси аъзо Франтишек Райторал якшанба куни ўз уйидан жонсиз ҳолда топилди, дея хабар бермоқда Анадўлу нашри.

«Газиантепспор» раҳбари Иброҳим Қизилнинг айтишича, Франтишек Райторал якшанба куни жамоасининг машғулотларида қатнашмаган. Телефон қўнғироқларига жавоб бўлмагач, жамоа вакиллари унинг уйига боришган. 31 ёшли футболчининг жасади ўз уйида осилган ҳолда топилган.

Полиция ҳодиса сабабларини ўрганишга киришди. Ҳозирча унинг нима сабабдан ўз жонига қасд қилгани номаълумлигича қолмоқда. «Газиантепспор» расмийлари ва Райторалнинг жамоадошлари унинг ўз жонига қасд қилиш учун муаммоси бўлганидан бехабарликларини айтишган.

Франтишек Райторал Чехия терма жамоаси таркибида 14 марта майдонга тушган. У 2012 йилги Европа чемпионатида терма жамоаси билан чорак финалгача етиб борган эди. Чехиялик ҳимпоячи ўтган йилнинг август ойида «Виктория Плзен» жамоасидан «Газиантепспор»га ўтган эди. Райторал «Виктория Плзен» таркибида 4 марта Чехия чемпиони бўлган.