Нидерландия полицияси ўнлаб заҳарли ва ўта хавфли жониворларни яширинча самолётга олиб чиқмоқчи бўлган шахсни ҳибсга олди, дея хабар бермоқда Guardian​ нашри.

Маълум бўлишича, Бразилия сафаридан қайтаётган Россия фуқароси Россияга учишидан олдин Амстердамдаги “Sxiphol​” халқаро аэропортида қўлга олинган. Унинг юклари орасида илонлар, қурбақа, калтакесак ва сувараклардан иборат заҳарли жонзотлар яширилгани аниқланган.

Озиқ-овқат ва истеъмолчилар хавфсизлиги бошқармаси вакили маълум қилишича, аниқланган жонзотларнинг бари инсон ҳаёти учун юқори даражада хавфли бўлган заҳарли жониворлардир. Қўлга олинган кишининг рюкзакидан 26 та ўта заҳарли илонлар, 10 та заҳарли қурбақа, 33 та суварак ва бир нечта калтакесак чиққан.

Россия фуқаросига нисбатан қандай айбловлар қўйилгани ҳозирча маълум эмас. У Амстердамдаги ҳибсхонада сақланмоқда.