Ўзбекистон Президенти Шавкат Мирзиёев 15 июнда От спорти ва йилқичиликни қўллаб-қувватлаш ҳамда ривожлантириш фондини ташкил этиш тўғрисидаги қарорни имзолади.
Ҳужжатда айтилишича, яқин кунларда Ўзбекистон от спорти федерацияси қошида йилқичилик ҳамда от спортини қўллаб-қувватлаш ва ривожлантириш Фонди ташкил этилади. Фонд маблағлари илмий-тадқиқот ишларини молиялаштириш, ҳакамлар, ветеринар ҳамда тақачилар малакасини қайта тайёрлаш ва оширишни такомиллаштириш, тажриба алмашиш, касбга оид кўникмаларни шакллантириш, шунингдек, юқори натижаларга эришган спортчи, мураббий, зоотехник ҳамда йилқичиларни моддий ва ижтимоий томондан қўллаб-қувватлашга йўналтирилади.
Қарор доирасида 2017—2021 йилларда йилқичилик ва от спортини комплекс ривожлантириш бўйича чора-тадбирлар Дастури қабул қилинади.
Ҳужжатда қорабайир ва ахалтекин зотли, тоза наслли спорт отларини етиштиришга алоҳида эътибор қаратилган. Бунинг учун замонавий комплекслар қурилиши, «Марказий ипподром» От спорти халқаро федерацияси талабларидан келиб чиқиб таъмирланиши ва жиҳозланиши кўзда тутилган.