АҚШда ўтган 24 соат ичида 57,5 ​​минг киши коронавирус билан касалланганлиги аниқланди - бу бутун пандемия учун энг юқори кўрсаткичдир, дея хабар беради The Washington Post. Таққослаш учун, Бразилияда ўтган куни 42,2 минг, Россияда 6,7 ​​мингта янги ҳолат қайд этилган.

АҚШда янги ҳолатлар бўйича охирги максимал кўрсаткич 2 июль куни қайд этилди. Ўшанда касалланганларнинг кунлик ортиши 55,2 минг кишини ташкил этган.

Нашрнинг таъкидлашича, АҚШ учун сўнгги тўққиз кун ичида бу кунига аниқланган инфекциялар сони бўйича еттинчи рекорддир. Энг кўп янги ҳолатлар Флорида штатида қайд этилди - 9488. Бу штатда кетма-кет 26 кундан бери кунлик рекорд даражадаги ўсиш қайд этилмоқда.

Мамлакатда кунига 721 минг киши коронавирусга тест топширмоқда. 

Мавзуга доир: Дунёда коронавирусга чалинганлар сони 11 миллионга етди

АҚШнинг бош инфекционисти доктор Энтони Фаучи кунлик янги аниқланишлар сони 100 мингга етишини прогноз қилди. Унинг сўзларига кўра, эпидемияга қарши курашда АҚШ "нотўғри йўналишда" ҳаракат қилмоқда ва "вазиятни тўлиқ назорат қилмаяпти". Пандемия тугаши билан Қўшма Штатларда кутилаётган касал ва ўлимлар сони ҳақида Фаучи айтиш қийин, аммо бу рақам "жуда ташвишли" бўлишини таъкидлади.

Жон Хопкинс университети маълумотларига кўра, Қўшма Штатлар коронавирус билан касалланганлар сони бўйича - 2,79 миллион киши ва ундан ўлганлар сони бўйича дунёда биринчи ўринда туради. Касаллик сони бўйича Бразилия иккинчи ўринда - 1,53 миллион, ундан кейин Россия 666,9 минг киши касалланган.