Россия федерал хавфсизлик хизмати "Шереметьево" аэропортида "Тонг жаҳони" мигрантларга ёрдам нотижорат ташкилоти раҳбари Валентина Чупикни қўлга олди.

ФСБ ходимлари ушбу ҳуқуқ ҳимоячисини Россияда қочоқ мақомидан маҳрум қилинганидан хабардор қилишди ва 2051 йилгача мамлакатга киришни тақиқлашди. Энди уни Ўзбекистонга депорт қилишади.

"Шереметьево" аэропортининг махсус қабулхонасида, F терминалида ўтирибман, ҳужжатларимни тортиб, мени шу ерга олиб келишди", дея видеомурожаат қилишга улгурган Чупик.

Валентина Чупик 2005 йилдаги Андижон воқеаларидан кейин Россияга кўчиб ўтганди. У кўп йиллар давомида Москвада яшаб, муҳожирларга бепул юридик ёрдамлар бериб келган.