Аввалроқ, Тошкентдаги “Халқлар дўстлиги” саройи яқинида юз берган йўл-транспорт ҳодисаси хабар берган эдик. ЙТҲда БМW ва Gentra автомобиллари тўқнашувидан сўнг Lacetti автомобили тўлиқ ёниб кетган эди.
Тошкент шаҳар Ички ишлар бош бошқармасининг расмий баёнотига кўра, 9-январь куни соат 23.30 да Чилонзор тумани Бунёдкор кўчасида жойлашган Халқлар дўстлиги саройи қаршисида иккита автомобиль иштирокида йўл-транспорт ҳодисаси рўй берди. “Ласетти” русумли автомобиль (давлат рақами 01 В 889 WA) ҳайдовчиси 44 ёшли Д. М. Ислом Каримов кўчасига бурилишдан олдин светофоргача бир неча метр масофа қолганида тор жойда тўхтаган. Тезликни ошириб ҳаракатланиб келаётган “BMW” автомобили (давлат рақами 01 Т 777 ЕВ, Шайхонтоҳур туманида яшовчи 63 ёшли К.М. номига расмийлаштирилган) “Ласетти”га тўқнашиши оқибатида автомобилларда ёнғин келиб чиққан.
“Ласетти” русумли автомобиль ҳайдовчиси ва 6 ёшли йўловчиси Д.М. Тошкент шаҳар ИИББ ЙПХ ва Миллий гвардия ходимлари томонидан қутқарилгач, жароҳат ва куйишлар билан шифохонага етказилганлар. Яна икки нафар йўловчилар – 44 ёшли И.М. ва 8 ёшли Я.М. воқеа жойида ҳаётдан кўз юмдилар.
“BMW” автомобили ҳайдовчиси воқеа жойидан яширинди. ЙТҲ содир бўлганида автомобилни бошқарган ҳайдовчининг шахсини аниқлаш бўйича чоралар кўрилмоқда.
ЙТҲнинг тахминий сабаби: “BMW” автомобили ҳайдовчиси тезликни кескин оширган.
ЙТҲ факти бўйича Чилонзор тумани ИИО ФМБ ҳузуридаги тергов бўлими томонидан Ўзбекистон Республикаси Жиноят кодексининг 266-моддаси (“Транспорт воситалари ҳаракати ёки улардан фойдаланиш хавфсизлиги қоидаларини бузиш”) “а” банди 3-қисми билан жиноий иш қўзғатилди, дейилади ИИББ хабарида.