Иқтисодий тадқиқотлар ва ислоҳотлар маркази (ИТИМ) республиканинг барча ҳудудларидан 998 та корхоналар иштирокида сўровнома ўтказди. Бу ҳақда марказ ахборот хизмати "sof.uz" га маълум қилди.

Сўровнома шуни кўрсатадики, тадбиркорларнинг ишбилармонлик кайфияти «ўртача даражада» ижобийдир, сўров шуни кўрсатдики, бизнеснинг ҳозирги ҳолат кўрсаткичи июнь ойида 30 пунктни ташкил этди (май ойида 15 пункт, апрелда - 26).

Июн ойида респондентларнинг 42 фоизи ўз бизнесларининг ҳолатини "қониқарли", 41 фоизи "яхши", 17 фоизи "ёмон" деб баҳолаган. Сўралганларнинг 35% фикрига кўра, сўнгги икки ёки уч ой ичида бизнеснинг ҳолати яхшиланди, 34% ўзгаришларни сезмаган, 31% эса ёмонлашувни қайд этган.

64% корхоналарда охирги икки-уч ой ичида ишчилар сони ўзгармади, 22% кўпроқ ишчилар кўпайганини айтди, 14% ишчилар сони камайганини қайд этди.

35% респондент товарлар ва хизматларга талабнинг пасайганлигини қайд этган, 32% эса ўзгаришларни сезмаган ва шу билан бир қаторда талаб ўсганлигини ҳам қайд этган.

Тадбиркорларнинг кейинги 2-3 ойда бизнесни ривожлантириш истиқболларига бўлган умидлари яхшиланди: индикатор 74 пунктни ташкил этди (май ойида 30, апрелда - 43).

Ишбилармонлик муҳити кўрсаткичи 51 пунктни ташкил этди (май ойида 22, апрелда - 35), яъни Ўзбекистондаги ишбилармонлик муҳити яхши, дея хулоса қилади ИТИМ. Яқин икки-уч ой ичида мамлакат иқтисодиёти жадал ривожланишни бошдан кечиради.