2020 йилда қизамиққа қарши мунтазам эмлашда узилишлар туфайли касалликнинг янги тарқалиши хавфи мавжуд. Бу ҳақда Жаҳон соғлиқни сақлаш ташкилоти (ЖССТ) сайтида маълум қилинди.
«2020 йилда 22 миллиондан ортиқ бола қизамиққа қарши эмлашнинг биринчи дозасини ўтказиб юборди. Бу 2019 йилга нисбатан 3 миллионга кўп. Қолаверса, бу охирги йигирма йилликдаги энг катта ўсишдир ва эпидемия учун хавфли муҳит яратади», дейилади ЖССТ ва АҚШ Касалликларни назорат қилиш ва олдини олиш маркази қўшма ҳисоботида.
2020 йилда қизамиқ билан касалланганлар сони ўтган йилга нисбатан 80 фоиздан кўпроққа камайган. Бироқ, инфекциялар сони камайганига қарамай, дунёда қизамиқ тарқалиши хавфи ўсишда давом этмоқда, дея огоҳлантирмоқда мутахассислар.
Ҳисобот муаллифларининг фикрича, дунёда қизамиқни эпидемиологик назорат қилиш ёмонлашган. Бундан ташқари, ёмон тест синови, касаллик ҳақида хабардорлик ҳам глобал ҳамжамиятни унинг тарқалишини олдини олиш қобилиятини хавф остига қўяди.