АОКА ҳузуридаги штабда бўлиб ўтган брифингда Халқ таълими вазирлиги матбуот котиби Лайло Рустамова умумтаълим мактабларда янги ўқув йили таълим жараёни борасидаги саволларга жавоб берди.
— Фарзандимни мактабга спорт формасида юборсам бўладими?
— Ўқувчининг мактабга кийиб борадиган либоси мактабнинг ички тартиб ва одоб-ахлоқ қоидаларига тўлиқ риоя этиши керак.
Мазкур қоидаларга кўра мактабга спорт либосида келишига йўл қўйилмайди.
— Анъанавий таълим олаётган ўқувчини исталган вақтда онлайн таълимга ёки аксинча онлайн ўқиётган ўқувчини анъанавий таълимга ўтказиш мумкинми?
— Ҳа, бу жараён ўқитувчини огоҳлантирган ҳолда амалга оширилиши мумкин.
— Қандай ҳолатда мактаб ёки синф хонаси карантинга олиниши мумкин?
— Битта синфда 3 нафар ўқувчида коронавирус аниқланган тақдирда синф Санитария эпидемиологик осойиштлик маркази томонидан карантинга олинади ва мактабда дезинфекция тадбирлари амалга оширилади.
Жами синфлар сонидан ёки ўқитувчи-ходимлар жами сонидан 10 фоизида тест натижалари ижобий натижани кўрсатганда мактаб карантинга олинади.