65 ёшдан ошган Москва аҳолиси ва сурункали касалликларга чалинган фуқаролар янги турдаги коронавирус тарқалишининг олдини олиш учун уй режимига риоя қилишлари керак, дея хабар беради пойтахт ҳокими Сергей Собянин.

26 мартдан янги қоидалар кучга киради. Уларнинг амал қилиш муддати 2020 йил 14 апрелгача давом этади. Ўзини изоляция қилиш режими билан боғлиқ харажатларни қоплаш учун кекса ва сурункали касал бўлган москваликларга 4000 рубль (320 минг сўм атрофида) миқдорида моддий ёрдам берилади, дейилади хабарда.

Коммунал тўловларни ўз вақтида тўламаганлик учун жарималар ва жарима йиғими ҳам вақтинча бекор қилинди. Бундан ташқари, алоқа операторлари уйда бўлганлар учун ноль ёки салбий балансга эга бўлган телефонлар ва Интернет абонентларни тармоқдан ўчирмасликлари шарт этиб белгиланди.