Аввал маълум қилинганидек, бугун АОКА штабида Соғлиқни сақлаш вазирлиги ҳузуридаги Коронавирусга қарши кураш штаби аъзоси Ҳабибулла Оқилов иштирокида брифинг бўлиб ўтди.

Брифингда муҳим савол ва мурожаатлар юзасидан жавоб қайтарилди.

Савол: Хусусий клиникаларга ҳам вирусга тест таҳлил олишга рухсат берилганини эшитдим. Бу тестлар қандай амалга оширилади? Экспресс-тестлар ёрдамидами ёки лаборатория текширувлари биланми? Ушбу тестлар натижаларининг аниқлик фоизи қанча?

Жавоб: Хусусий клиникаларда тест ўтказиш қарори ишлаб чиқилмоқда. Ўзбекистонда тестлар лабораторияда полимераза занжирли реакцияси ёрдамида амалга оширилади. Ўзига хослик, сезувчанлик ва маълумотлар аниқлиги юқори даражада.

Экспресс-тестлар бизда ўтказилмайди.

Савол: Карантин вақтида бачадон миомасини олиш бўйича қаерда операция қилиш мумкин. 103 жавоб бермаяпти. Скутерда шошилинч тиббий ёрдам марказига бордик. У ерда қон тўхтатувчи укол қилишди ва карантин вақтида ҳеч ким операция қилмаслигини айтишди.

Жавоб: Бу масалада акушерлик ва гинекология ихтисослашган маркази директорига мурожаат қилдик. Уларнинг таъкидлашича, Марказда ётқизиш ва операция ўтказишда ҳеч қандай тўсиқ ва муаммолар йўқ экан.