Валюта курси: Ўз.Р.Марказий банки
USD
АҚШ доллари
EUR
Eвро
RUB
Россия рубли
Sayt test rejimida ishlayapti!!!

Сўнгги янгиликлар






"Коррупцияга қарши жамоатчилик, нодавлат ташкилотлар ҳам бирдек курашмас экан, амалий натижага эришиб бўлмайди" – “Миллий тикланиш” демократик партияси
18.12.2021 13:54,  
24

Мамлакатимизда коррупцияга қарши курашиш масаласи умумдавлат миқёсидаги вазифа сифатида белгиланди ва унинг пайини қирқиш бўйича изчил ҳаракатлар қилинмоқда. Бу борада ташкилий-ҳуқуқий механизмлар яратилди. Хусусан, 2017 йил 3 январдан “Коррупцияга қарши курашиш тўғрисида”ги Қонун кучга киргани энг муҳим қадам бўлди. Шунингдек, қароралар, давлат дастурлари қабул қилиниб, ижросини таъминлаш чоралари кўрилди.

Албатта, бу иллатга қарши жамоатчилик, нодавлат ташкилотлар ҳам бирдек курашмас экан, амалий натижага эришиб бўлмайди.

Шу маънода, “Миллий тикланиш” демократик партиясининг 2020-2024 йилларга мўлжалланган Сайловолди дастурида коррупцияга қарши муросасиз курашиш бўйича белгиланган вазифалар ижросини таъминлаш, бу борада талаба-ёшларнинг билимини ошириш, қонунчилик билан таништириш, таълим тизимидаги коррупцион ҳолатлар ва уларнинг келиб чиқиш сабабларини аниқлаш, бартараф этиш чораларини кўриш, унга қарши курашиш борасида таклифлар ишлаб чиқиш устувор вазифа сифатида белгиланган.

“Миллий тикланиш” демократик партияси Марказий кенгаши, Олий Мажлис Қонунчилик палатасининг Коррупцияга қарши курашиш ва суд-ҳуқуқ масалалари қўмитаси билан ҳамкорликда ташкил қилинган “Қонун – коррупцияга қарши курашишда энг самарали қурол” мавзусидаги иншолар танлови ҳам партия дастури ижроси бўйича амалга оширилаётган тадбирлардан биридир.

Ўзбекистон ҳамда хорижий олий ўқув юртларининг бакалавр ва магистратура босқичларида таҳсил олаётган ёшлар ўртасида 9 декабрь – Коррупцияга қарши кураш куни муносабати билан 2021 йил 26 ноябрь куни ушбу танлови эълон қилинди. Иншолар шу йил 9 декабрга қадар @MTYoshlarmurojaatiBot орқали қабул қилинди.

Белгиланган вақт давомида бот орқали 100 га яқин олий таълим муассасаси талабаларидан 1000 га яқин иншолар келиб тушди. Иштирокчиларнинг 41 фоизини йигитлар ва 59 фоизини талаба қизлар ташкил қилади. Иншоларни кўриб чиқиш ва саралаш мақсадида партия Марказий кенгаши масъул ходимлари, Олий Мажлис Қонунчилик палатаси депутатлари ҳамда Ёшлар парламенти аъзоларидан иборат ишчи гуруҳи шакллантирилди.

Иншолар тўрт босқичли саралашдан ўтказилди ва сўнгги босқичда Олий Мажлис Қонунчилик палатаси депутатлари, ёзувчи Хуршид Дўсмуҳаммад ва шоира Фарида Бўтаевалар томонидан 17 та иншо саралаб долзарблиги, кўлами ва иллатга қарши кураш чораларига доир таклифлар нуқтаи назаридан кўриб чиқилди ва 10 нафар ғолиблар аниқланди.

Ғолибларнинг барчаси 17 декабрь куни Тошкент шаҳрига йиғилдилар.

Улар куннинг биринчи ярмида Олий Мажлис Қонунчилик палатасида бўлиб, “Миллий тикланиш” демократик партияси фракцияси фаолияти билан танишди. “Коррупцияга қарши курашишда ёшларнинг ўрни” мавзусидаги очиқ мулоқотда иштирок этиб, Коррупцияга қарши курашиш ва суд-ҳуқуқ масалалари қўмитаси раиси, партия фракцияси аъзоси Жаҳонгир Ширинов билан учрашди.

Ж.Ширинов мамлакатимизда коррупцияга қарши курашиш бўйича сўнгги йилларда амалга оширилаётган чора-тадбирлар, қонунчиликдаги ўзгаришлар ҳақида маълумотлар берди.

– Албатта, бу иллатга қарши фақат ҳуқуқни муҳофаза қилиш идорлари эмас, кенг жамоатчилик ҳам бирдек курашиши лозим. Шундагини бу борада қилинаётган ишлар самара беради, – деди қўмита раҳбари.

Танлов ғолиблари Ж.Шириновдан ўзларини қизиқтирган саволларига жавоб олди.

Жумладан, Дилшод Файзиев коррупцион ҳолатларни содир этган шахслар бўйича рўйхат шакллантирилаётганига тўхталиб, рўйхатга тушган шахс қачонлардир ундан чиқарилиши мумкинми, деган савол билан мурожаат қилган бўлса, Муниса Райимова мактаб олимпиадалари шаффофлигини таъминлаш бўйича ўзининг таклифини берди.

– Мактабларда ўтказилаётган олимпиадаларда коррупцион ҳолатлар ҳақида кўп гапиряпмиз. Шундай ҳолатларнинг олдини олиш учун мактаб олимпиадаларини ҳам камералар орқали жамоатчиликка кўрсатиш керак. Шунингдек, олимпиадаларда ғолиб бўлган ўқувчиларнинг ёзилган ижодий ишларини газета ва интернет нашрларида ҳам эълон қилиш лозим. Бу мактаб олимпиадаларининг шаффоф бўлишини таъминлар эди, – деди М.Райимова.

“Миллий тикланиш” демократик партияси Марказий кенгаши раиси ўринбосари Феруза Муҳамеджанова аёлларнинг коррупцияга қарши курашишдаги ўрни ҳақида қуйдагича фикр билдирди:

– Ҳурматли Президентимиз учрашувларидан бирида аёлларнинг коррупцион ҳолатларнинг олдини олишдаги ўрни жуда муҳимлигини таъкидлаган эдилар. Узумини е, лекин боғини суриштирма деган гап жуда ёмон. Аёллар боғини суриштириши керак. Чунки аёллар эркакларга тез таъсир кўрсата олади.

Иншолар танлови иштирокчилари Олий Мажлис Қонунчилик палатасининг ялпи мажлислар ўтказиладиган зали, кутубхона ҳамда музей фаолияти билан ҳам танишди.

Танлов иштирокчилари куннинг иккинчи ярмида “Миллий тикланиш” демократик партияси Марказий кенгашида бўлиб, партия Марказий кенгаши раиси Алишер Қодиров билан учрашди.

Партия етакчиси бугун мамлакатимизда ёшларнинг билим олиши, уларни ватанпарвар, қадриятларимизга ҳурмат руҳида тарбиялаш борасида амалга оширилаётган ишлар, бу борада қонунчилигимиздаги ўзгаришлар, шунингдек, партияда ёшларнинг ролини ошириш бўйича қилинаётган ишлар ҳақида гапирди.

– "Миллий тикланиш" партияси "Инсонни ўзгартириш орқали жамиятни ўзгартирамиз" шиорини бежиз танлагани йўқ. Аввало ўзимиз ўзгармас эканмиз, жамиятимизни ўзгартира олмаймиз. Ўзгариш эса ёшлардан бошланди, – деди A.Қодиров.

Шундан сўнг танлов ғолиблари эълон қилинди. Уч нафар биринчи, уч нафар иккинчи ва тўрт нафар учинчи ўрин ғолибларига мукофотлар топширилди.

Жумладан, биринчи ўрин ғолиблари бир йиллик ўқув курсига йўлланма ва “IELTS” сертификати учун тўлов, иккинчи ўрин ғолиблари олти ойлик ўқув курсига йўлланма ва “IELTS” сертификати учун тўлов ва учинчи ўрин ғолиблари эса “IELTS” сертификати учун тўлов билан тақдирланди. Шунингдек, ғолибларга партиянинг Ташаккурномаси ва эсдалик совғалари топширилди.

 

 

 

 

 

Тавсия этамиз






Тавсия этамиз

Ҳар доим хабардор бўлинг!

carzone.uz мобил иловаларини кўчириб олинг ва барча янгиликлар сиз билан