Россия ташқи ишлар вазири AҚШнинг ўз қўшинларини Aфғонистондан олиб чиқиши, ҳамда Aфғонистон ҳукуматининг Толибонларга нисбатан душманлик кайфияти бугунги кундаги вазиятга сабаб бўлганини таъкидлади.
Жума куни журналистлар билан суҳбатда Сергей Лавров Aфғонистон ҳукумати мамлакат келажаги ҳақида Толибон билан музокаралар олиб боришни истамаганлигини айтди.
"Шу нуқтаи назардан, Толибон вазиятни ҳарбий йўл билан ҳал қилишга ҳаракат қилди", деди Лавров.
Жума куни Толибон мамлакат жанубидаги бир қатор ҳудудларни эгаллаб олди. Келгуси кунларда, агарда вазият ўзгармаса, пойтахт ҳам уларнинг қўлига ўтиши мумкин.
Шу билан бирга, вазир музокараларни қайта тиклашга чақирди ва Aфғонистон билан чегарадош Ўзбекистон ва Тожикистон юзасидан ташвишда эканлигини айтди.