Мактаб ўқувчилари ўртасидаги AIMO Осиё халқаро математика олимпиадаси 2012 йилдан буён ўтказиб келинади. Олимпиадада Осиёнинг Хитой, Малайзия, Сингапур, Индонезия, Таиланд, Филиппин, Тайван, Макао, Жанубий Корея, Қозоғистон ва Ўзбекистон каби мамлакатларининг 2-11- синф ўқувчилари билан бир қаторда Болгария, Бразилия давлатларидан ҳам ўқувчи ёшлар иштирок этишади - деб хабар бермоқда 'Xalq so'zi'.

Олимпиада икки — саралаш ва финал босқичларидан иборат. Жорий саралаш босқичида Навоий шаҳридаги 16-умумтаълим мактабининг 7 нафар иқтидорли ўқувчиси — Дилнурбек Шодиев, Ботирбек Қодиров, Сухробжон Исроилов, Нурафшона Муфтиллаева, Акбаржон Зокиров, Амиршоҳ Муфтиллаев, Сардорбек Асқатов муваффақиятли иштирок этишиб, олтин, кумуш ҳамда бронза медалларини қўлга киритишди. Мактабнинг 4, 5, 6 ва 8-синфларида таълим олаётган бу ўқувчилар энди август ойида Корея Республикаси мезбонлик қиладиган финал босқичида иштирок этишади.

— Ўқувчиларнинг ютуқларга эришишида Дилноза Ёдгорова, Дилдора Норова, Муаттар Халилова, Заҳира Исаева каби тажрибали педагогларимизнинг меҳнатини эътироф этиш жоиз, — дейди мактаб директорининг ўқув ишлари бўйича ўринбосари Мадамин Турсунов. — Айни кунларда улар ўқувчи ёшларни финал босқичига индивидуал график асосида тайёрлашмоқда.