Ўзбекистон Олий Мажлисининг инсон ҳуқуқлари бўйича вакили (омбудсман) бино бир йилдан кўпроқ вақт муқаддам Тошкент метрополитени балансига ўтказилгани сабабли янги ходимларни штатга қабул қила олмаяпти. Бу ҳақда омбудсман Улуғбек Муҳаммадиев жума куни Сенатнинг 18-ялпи мажлисида маълум қилди.

Tashkent City ишбилармонлик маркази қурилиши муносабати билан «Тошкент метрополитени» биноси бузилган эди. Ўтган йилнинг январида ҳоким қарори билан метрополитенга Шайхонтоҳур тумани Ислом Каримов кўчасидаги омбудсман котибияти жойлашган бино берилган эди.

Улуғбек Муҳаммадиев президентнинг Инсон ҳуқуқлари умумжаҳон декларацияси қабул қилинганининг 70 йиллигига бағишланган тадбирлар дастури тўғрисидаги фармонида омбудсман штати саккиз кишига кенгайтирилган эди. Бироқ уларни жойлаштириш билан боғлиқ муаммо сабабли янги ходимларни ёллашнинг имконияти бўлгани йўқ.

«Айни вақтда вакил котибияти жойлашган бино бошқа ташкилотга берилган. Шу сабабли янги ходимларни қабул қилиш ва уларни жойлаштириш муаммоси бор. Ўйлайманки, 2019 йилда мазкур муаммога ечим топилади», — деди у.

Сенатор Очил Хидиров нима учун омбудсман бир йил ичида маъмурий бинога эга бўла олмади, дея савол берди. Тошкент ҳокими Жаҳонгир Ортиқхўжаев «Тошкент метрополитени"ни ва диспечерлик марказини жойлаштиришни стратегик муҳим объект экани билан асослади.

«Бу объект стратегик объектлар рўйхатига киради. Тошкент ҳокимияти омбудсман учун мақбул биноларни ўрганди. Ҳокимият балансида маъмурий бинолар бўлмагани сабабли мос келувчи бошқа маъмурий бинолар бўйича таклифлар ўрганилди. Таклиф сифатида Чилонзор тумани Бешёғоч кўчасида Ўзбекистон Миллий банки ҳузуридаги VIP Servise маркази балансидаги маъмурий бинода зарур майдон ажратилди», — деди пойтахт маъмурияти раҳбари.

Унинг сўзларига кўра, агар таклифни томонлар қаноатлантирса, ҳокимнинг тегишли қарори қабул қилинади.