Ўзбекистон Республикаси Президентининг «Рақобатбардош маҳсулотлар ишлаб чиқаришни янада кенгайтириш чора-тадбирлари тўғрисида»ги қарорига биноан Ўзбекистонда 82 турдаги хомашё ва ярим тайёр маҳсулотлар импорт божидан озод қилинди. Бу ҳақда «Норма» хабар берди.
Ҳужжат билан 2024 йил 1 январга қадар импорт божхона божи «ноль» ставкада қўлланиладиган айрим турдаги хом ашё ва ярим тайёр маҳсулотлар рўйхати тасдиқланди. Рўйхатга қуйидаги маҳсулотлар киритилган:
– кастор ёғи ва унинг фракциялари;
– асбест;
– натрий гидроксиди (каустик сода) қаттиқ шаклда;
– карбидлар, кимёвий таркиби аниқ ёки ноаниқ;
– ўсимлик ёки чорвадан олинадиган бўёвчи моддалар;
– керамик маҳсулотлар, эмаль ёки ойна ишлаб чиқариш учун мўлжалланган – шишасимон эмаллар ва глазурлар ва шунга ўхшаш препаратлар;
– тўқимачилик бўёғи;
– сирти фаол органик моддалар (совундан ташқари); сирти фаол воситалар, ювиш – воситалари (шу жумладан ёрдамчи ювиш воситалари) ва таркибида совун –– мавжуд ёки мавжуд бўлмаган тозалаш воситалари;
– мойлаш материаллари ҳамда тўқимачилик матолари, чарм, мўйна ёки бошқа материалларга ёғ ва мой билан ишлов бериш учун фойдаланиладиган воситалар;
– сунъий мум;
– тайёр елимлар ва бошқа жойда номланмаган ёки киритилмаган бошқа тайёр адгезивлар;
– ферментлар, ферментли препаратлар;
– тўқимачилик тармоғида қўлланиладиган пардозлаш воситалари, бўяшни тезлаштириш ёки бўёқларни мустаҳкамлаш воситалари ва бошқа маҳсулотлар ҳамда тайёр препаратлар;
– сунъий мўйна;
– елимланган фанера, фанера ҳолига келтирилган панеллар ва қатламли ёғочдан шунга ўхшаш материалла;
– фильтр қоғоз ва картон;
– аппаратда йигирилган жун калава ипидан ёки аппаратда йигирилган жониворларнинг ингичка сочидан тайёрланган газламалар;
– зиғирпоя толасидан тўқилган газламалар;
– комплекс синтетик ва сунъий иплардан тўқилган газламалар;
– кимёвий иплардан ва бошқа тўқимачилик материалларидан тўқилган тўрлар.