Тошкент, Жиззах, Сирдарё вилоятлари ҳамда Фарғона водийси вилоятларида қуруқ ва жуда илиқ ҳаво сақланиб туради, ҳарорат меъёрий қийматлардан 8-10 даражага юқори бўлиб, 20-25 даража бўлади, айрим жойларда 27 даражагача кўтарилади. 

«Ўзгидромет» хабарига кўра, республиканинг қолган ҳудудларида айрим жойларга ёмғир ёғади ва ҳаво ҳарорати 18-23 даражадан ошмайди. Республика бўйича айрим жойларда шамолнинг тезлиги 15-20м/с гача кучайиши мумкин. Кечга бориб ҳаво айнийди, осмонни булут қоплаб тунги соатларда бутун мамлакат ҳудудида ёмғир ёғиши кутилмоқда.

Эртага, Наврўз байрам кунида кун давомида республикада ёмғир ёғади, фақат шимоли-шарқий туманларда ёғингарчилик бўлмайди. Мамлакатнинг барча ҳудудларида кундузги ҳаво ҳарорати 18-23 даражани ташкил қилади, бу меъёрдан 2-3 даражага юқори. Шамолнинг тезлиги 15-20 м/с гача кучайиши мумкин. Мамлакат пойтахтида кечаси ва куннинг биринчи ярмида ёмғир ёғади. Шамол 5-10 м/с тезликда эсади, 12-17 м/с гача кучайиши мумкин. Ҳарорат кечаси 14-14 даража илиқ, кундузи 18-20 даражани ташкил қилади.

Дам олиш кунларида нам ҳаво оқими республика ҳудудидан чиқиб кетади. Об-ҳаво ёғингарчиликсиз бўлади, ҳарорат кечаси 10-15 даража, кундузи 20-25 даража бўлади, бу йилнинг шу даври учун хос бўлган меъёрий қийматлардан 4-5 даражага юқори.