2020 йилда 858 та мактаблар аттестациядан ўтказилди. Аттестациядан ўтган мактабларнинг 803 таси (93,5%) аккредитацияланди. Бу ҳақда Вазирлар маҳкамаси ҳузуридаги Таълим сифатини назорат қилиш инспекцияси бошлиғининг маслаҳатчиси хабар берди.

Маълум қилинишича, белгиланган таълим сифати талабларига жавоб бермаганлиги учун 55 та (6,5%) мактаб аттестациядан ўтмади ва аккредитацияланмади.

Аттестациядан ўтмаган мактабларда аниқланган камчиликларни бартараф этиш бўйича Халқ таълими вазирлигига 3 та тақдимнома киритилди. Мактаблар фаолиятида аниқланган 7657 та камчиликлар бартараф этилди.

Аттестация давомида битирувчи ўқувчиларидан назорат ишлари олинди, шунингдек педагоглар, ўқувчилар ва уларнинг ота-оналаридан мактаб фаолиятини баҳолаш бўйича сўровномалар ўтказилди.

12708 нафар ўқитувчиларнинг дарс машғулотлари таҳлил қилинди.

Дарс таҳлили натижаларига кўра:

• Фаолияти ўрганилган ўқитувчиларнинг 1527 нафари (12%) дарс жараёнида ўқитишнинг интерфаол усулларидан фойдаланмаган;
• Уларнинг 890 нафари (7%) дарс жараёнини ҳаётга боғлаган ҳолда (компетенциявий ёндашувлар асосида) ташкил этмаган;
• 763 нафари (6%) дарс жараёнида ўқувчиларнинг фаол иштирок этишига эриша олмаган.