21 сентабр, душанба куни Ҳиндистонда Тож Маҳал мақбараси ва бир нечта мактаблар оммавий ташрифлар учун очилди, деб хабар бермоқда Hindustan Times. 

Хабарларга кўра, Тож Маҳал олти ойдан ортиқ ёпилганидан кейин қайта очилди. Мақбарада масофаланишнинг махсус шартлари ва бошқа чекловлар жорий қилинган. Масалан, кунлик ташриф буюрувчилар сони беш минг кишидан ошмаслиги керак. Бобурий ҳукмдор Шоҳжаҳон ва унинг рафиқаси Мумтаз Маҳалнинг қабрлари жойлашган асосий мақбарага бештадан ортиқ меҳмон кира олмайди.

Бундан ташқари, Жамму ва Кашмир штатида мактаблар очилиши ҳақида хабар берилган, ҳозирга қадар фақат ўрта мактаб ўқувчилари учун. Штат аҳолиси 12,5 миллион кишидан ошади.

РИА Новости хабарига кўра, биринчи куни Тож Маҳалга 2500 дан ортиқ одам ташриф буюрган. Шу билан бирга, коронавирусга қадар мақбара зиёратчиларининг ўртача сони кунига 40 минг кишини, энг юқори нуқтасида эса кунига 170 минг кишини ташкил этган.

Эслатиб ўтамиз, ўтган кун давомида Ҳиндистонда 87 000 та янги коронавирус ҳолатлари аниқланди. Ҳиндистон COVID-19 аниқланган ҳолатлари бўйича дунёда иккинчи ўринда туради, ССВнинг сўнгги маълумотларига кўра, мамлакатда ушбу касалликка чалинган 5,48 миллиондан ортиқ одам аниқланган. Бир миллиондан ортиқ одам касалхоналарда даволанмоқда.