Қирғизистонда такрорий парламент сайловлари шу йил 20 декабрга белгиланди. Бу ҳақда чоршанба куни республика Марказий сайлов комиссиясига таяниб ТАСС хабар бермоқда.

Хабарга кўра, бу қарор аввалги овоз бериш натижалари бекор қилинганлиги билан боғлиқ. Дастлабки маълумотларга кўра, 20 декабр куни овоз беришга тайёргарлик кўриш ва уни ўтказиш учун бюджетдан 450 миллион сом (тахминан 5,55 миллион доллар) ажратилади.

4 октябр куни Қирғизистоннинг юқори қонун чиқарувчи органига сайловлар бўлиб ўтди, унда 16 сиёсий партиялар вакиллари қатнашдилар. Уларнинг фақат тўрттаси 7% тўсиқни енгишга муваффақ бўлишди. Эртаси куни мағлуб бўлган партиялар тарафдорлари пойтахтда митинглар уюштирдилар, шундан сўнг тартибсизликлар бошланиб, кейинчалик Кубатбек Боронов бошчилигидаги ҳукумат ва Президент Сооронбай Жээнбеков истеъфога чиқдилар.

Воқеалар фонида МСК сайлов натижаларини бекор деб топди, чунки сайловлар пайтида партиялар сайловчиларга катта миқдордаги пора бериш билан шуғулланган.

Айни пайтда 120 ўринга эга бўлган Қирғизистон парламенти таркибига олтита сиёсий куч вакиллари киради. Мамлакат бош вазири ва президент вазифасини бажарувчи этиб тайинланган Садир Жапаров сайловларда қатнашадиган партиялар учун сайлов чегарасини пасайтиришни таклиф қилмоқда. Ушбу масала жорий чақириқ депутатлари томонидан 21 октябрга белгиланган навбатдан ташқари йиғилиш пайтида муҳокама қилинади.