Италиянинг кичкинагина Жилё ороли (Тоскан архипелагининг бир қисми) аҳолисидан касаллик тарқалиши учун қулай шароитларга қарамай, пандемия бошлангандан бери бирор киши коронавирус билан касалланмаган. Бу ҳақда Fox News телеканали хабар бермоқда.

Ўрта Ер денгизидаги 23,8 квадрат километрлик оролда тахминан 800 киши истиқомат қилади. Улар порт яқинидаги кўчаларда ёки зич жойлашган уйлар орасидаги тор кўчаларда доимий алоқада бўлишади.

Бироқ, ҳозирги кунга қадар Жилё аҳолисининг ҳеч бири COVID-19 аломатларини кўрсатмаган.

Шу билан бирга, 40 йил давомида оролнинг ягона шифокори бўлган доктор Армандо Скиафино коронавируснинг маҳаллий аҳоли орасида тарқалишидан жуда хавотирда эди. Унинг сўзларига кўра, қизил тошма, қизамиқ ёки сувчечак каби касалликлар бир неча кун ичида орол бўйлаб тарқалади ва "деярли барча юқтиради".

Жилёда коронавирус билан боғлиқ биринчи маълум бўлган ҳодиса февраль ойида оролга келган 60 ёшли одам эди. У қариндошининг дафн маросимида қатнашди ва ўша куни Италиянинг материк қисмига қайтиб кетди. Уч ҳафта ўтгач, эркак касалхонада вафот этди.

Бир неча ҳафта ўтгач, оролга яна учта меҳмон келди, улар ҳам коронавирусга чалинган эдилар. Улардан бири бир неча кун жилёлик дўстлари билан турли жойларда, шу жумладан жамоат овқатланиш жойларида суҳбатлашган немис эди. Бир неча ҳафта ўтгач, кучли йўтал туфайли у текширувдан ўтди ва унда коронавирус аниқланди.

Коронавирус билан касалланган бошқа одамлар ҳам оролга келишган. Аммо маҳаллий аҳолининг ҳеч бири касал бўлмади. Оролнинг 800 аҳолисидан 723 киши антитаначалар мавжудлигини текширишга рози бўлишди, натижада немис меҳмони билан битта паромга чиққан кекса италияликда аниқланди. 

Олимлар Жилё ҳодисасини ҳали тушунтириб бера олишмаяпти. Миландан келган эпидемиология профессори Паола Мути, генетик хусусиятлари туфайли туб аҳолига коронавирус таъсир қилмайди, деб айтди. Бошқа версияга кўра, COVID-19 оролликлар орасида мутлақо аломатларсиз тарқалган. Шунингдек, оролда яшовчилар юқтириш учун коронавирус инфектсиясига етарлича дуч келмаган бўлиши мумкин.

Американинг Жон Хопкинс университети маълумотларига кўра, 28 июль ҳолатида Италияда 246 286 та COVID-19 ҳолати тасдиқланган (дунёда 15-ўрин) ва 35 112 ўлим ҳолатлари қайд этилган.