Ўзбекистон ва Тожикистон чегарасида жойлашган заставага 20 нафар маскали, номаълум кишилар қуролли ҳужум уюштирди. Бу ҳақда Тожикистон Миллий хавфсизлик давлат қўмитасининг Чегара қўшинлари матбуот хизмати хабар тарқатган.
Чегара қўшинлари тарқатган пресс-релизда айтилишича, 20 нафар қуролланган номаълум шахслар, 6 ноябрга ўтар кечаси “Султонобод” чегара отряди ҳарбий қисмининг Ишкободдаги 4-сонли чегара заставасига ҳужум қилган. Ҳужум давомида, улар 5 та АКМ автоматларини қўлга киритишди.
Шундан сўнг, ҳарбийларнинг операцияси натижасида, ҳужум қилган шахслар ўраб олинади ва 15 таси йўқ қилинади. Қолган 5 таси қўлга олинади.
Операция давомида чегара қўшинларининг бир нафар аскари ва бир нафар Тожикистон ИИВ ходими ҳам ҳалок бўлган.
Ҳозирда воқеа жойда тезкор-тергов гуруҳи тузилган бўлиб, суриштирув ишларини олиб бормоқда.