Тожикистон соғлиқни сақлаш ва ижтимоий ҳимоя қилиш вазирлиги мамлакат ТИВ ҳамда туризмни ривожлантириш қўмитасига коронавирус эпидемияси билан боғлиқ Хитойдаги вазият барқарорлашгунга қадар бу мамлакатга бизнес ва сайёҳлик сафарларини чеклаш тўғрисида илтимоснома юборди деб ёзмоқда Тожикистоннинг Asia-Plus нашри.

Соғлиқни сақлаш вазири ўринбосари Мирҳамуддин Камолзоданинг сўзларига кўра, вазирлик вазиятни назоратда ушлаб туради ва Хитойдан Тожикистонга келаётган барча фуқароларни синчиклаб текширади.

“Биз фақат фуқароларимизни ҳимоя қиламиз ва улардан Хитойга боришдан сақланишларини сўраймиз. Бошқа мамлакатлар фуқароларининг мамлакатимизга киришини чеклаш ҳуқуқига эга эмасмиз, аммо хавфсизлик нуқтаи назаридан биз Хитойдан келган барча фуқароларни, шу жумладан тожикларни ҳам текшириб кўрамиз ", дея қўшимча қилди у.

Хабарда айтилишича, ҳали Тожикистонда коронавирус билан касалланган киши қайд этилмаган.

“Тожикистон билан чегарада ва аэропортларда карантин пунктлари мавжуд. Янги вирус ҳақида маълумот пайдо бўлгандан сўнг, Тожикистон ҳукумати Хитойдан ташриф буюрувчилар устидан назоратни кучайтирди ”, деди у.

Эслатиб ўтамиз, Хитойда юзлаб одамлар аллақачон пневмонияни келтириб чиқарадиган илгари номаълум бўлган коронавирусни юқтиришган.

Мавзуга доир: Таиланд Хитойдаги номаълум вирус туфайли аэропорт хавфсизлигини кучайтирмоқда