"Тошкент" Республика фонд биржасидаги (РФБ) савдолар ҳажми 12-16 октябр кунлари 8,3 млрд. сўмгача ўсди. Ушбу кўрсаткич бир ҳафта аввалги кўрсаткичдан 7,4 баравар юқори, деб хабар бермоқда биржа матбуот хизмати.
Ушбу ўсишни 12 октябрда Трастбанк акциялари билан 7,4 миллиард сўмлик битим таъминлади. Битим Nego Board музокаралар олиб бориладиган 4.979.306 дона оддий акциялар (1.38%) секциясида амалга оширилди. Молия институти маълумотларига кўра, ҳозирги кунда банк акциядорлари 500 дан ортиқ юридик ва жисмоний шахслардир.
Таъкидланишича, ушбу йирик битимдан ташқари, "Универсал" банкнинг оддий акциялари билан 496,3 млн. сўмлик битим ҳам имзоланган. Шунингдек, 12-16 октябр кунлари савдо майдончасида "Ўзметкомбинат" АЖ (118,3 млн. сўм), "Кварц" (78,7 млн), "Қизилқумцемент" (40,47 млн), "Ҳамкорбанк" (36,3 млн) қимматли қоғозлари билан савдолар амалга оширилди.
Ушбу даврда РФБда 647 та битим имзоланди. Бир ҳафта олдин эса улар сони 575 та эди.