Украина президенти Владимир Зеленский мамлакатнинг “Украина Халқаро Авиалиниялари” авиакомпаниясига тегишли Boeing 737-800 русумли йўловчи самолёти ҳалокатга учраши муносабати билан 9 январни “мотам куни” деб эълон қилди. Хабар қилинишича, кеча кечқурун ўтган ишчи мажлис охирида шундай қарорга келинган.
Мотам кунида давлат ҳокимияти органлари, маҳаллий ўзини-ўзи бошқариш муассасалари, ташкилот ва идораларга тегишли иншоотлар олдида ўрнатилган Украина байроғи авиаҳалокатда қурбон бўлганлар хотираси учун ярмигача пастга туширилади.
Мавзуга доир: Теҳронда қулаган самолёт йўловчиларининг аксари Эрон ва Канада фуқаролари бўлган
Эрон пойтахти Теҳрондан Украина пойтахти Киев шаҳрига PS 752 рақами билан парвозни амалга ошираётган, бортида 176 йўловчи, шу жумладан, 9 экипаж аъзоси бўлган Boeing 737-800 самолёти кеча, 2020 йил 8 январ куни маҳаллий вақт билан соат 6:12 да Имом Ҳумайний халқаро аэропортидан ҳавога кўтарилган ва орадан 2 дақиқа ўтиб, аэропорт яқинидаги Паранд мавзесида қулаб тушган.
Украина ташқи ишлар вазирлигининг маълум қилишича, ҳалок бўлганлар қуйидаги давлатлар фуқароларидир:
- Эрон фуқаролари – 82 нафар
- Канада фуқаролари – 63 нафар
- Украина фуқаролари – 11 нафар
- Швеция фуқаролари – 10 нафар
- Афғонистон фуқаролари – 4 нафар
- Германия фуқаролари – 3 нафар
- Буюк Британия фуқаролари – 3 нафар.