UzAuto Motors компанияси хориждан импорт қилинадиган “Trailblazer” йўлтанламасига 12 фоизгача чегирма эълон қилди.
Автомобилнинг чегирмасиз нархи – 398 млн сўм. 31 июлгача давом этадиган акцияда кроссовер 349 млн сўмгача арзонлаштирилди (фарқ – 49 млн сўм).
Kun.uz компания матбуот хизматидан олган маълумотга кўра, “Trailblazer” кўп сотилмай қолаётгани учун шундай акция эълон қилинган.
“Кўпинча, бундай чегирмалар омборларда кўп миқдорда сотилмай қолган автомашиналар учун берилади. Ўтган йили “Malibu” ва “Tracker” автомашинаси учун акция эълон қилинган. Бундай акциялар аввал ҳам бўлган», – деди UzAuto Motors масъули.
Kun.uz суҳбатлашган Тошкентдаги автосалонлар менежерларига кўра, белгиланган чегирмалар автомашинанинг қачон ишлаб чиқарилгани ва рангига қараб амал қилади.
2021 йилда ишлаб чиқарилган “Trailblazer”ларга (рангига қараб) 1–3 фоизгача чегирма белгиланган бўлса, 2020 йилда ишлаб чиқарилганларига (рангига қараб) 7–12 фоизгача акция миқдорлари белгиланган.
Шунда “Trailblazer” (Blue me away рангида, 2020 йил)нинг нархи энг камида 349 миллион сўмни ташкил этади. Aкция билан энг юқори нарх қора рангли, 2021 йилда ишлаб чиқарилган “Trailblazer”га тўғри келади (394 миллион сўм).
Ижтимоий тармоқ фойдаланувчиларининг айримлари бу чегирмалар маълум тоифа амалдорларга “Trailblazer”ли бўлиб қолиш имконини берганига эътибор қаратди.
Қонунчиликка кўра, вазирлар ва давлат қўмиталари раҳбарларининг ўринбосарлари ҳамда вилоятлар ҳокимларининг ўринбосарларига бириктириладиган автомашиналар нархи 1500 БҲМдан ошмаслиги керак. Айни пайтда бу сумма 367 миллион сўмни ташкил қилади.