Бугун АОКА ҳузуридаги штабда Коронавирусга қарши курашиш штаби аъзоси Наргиза Нуруллаева иштирокида брифинг бўлиб ўтди. Брифингда коронавирус инфекцияси бўйича муҳим саволлар юзасидан жавоб қайтарилди.
Савол: Хусусий клиникаларда тест нархлари бирор ташкилот томонидан назорат қилинадими ёки улар ўзлари хоҳлаган нархда тест текшируви ўтказишлари мумкинми?
Жавоб: Хусусий клиникалар олиб келадиган тестларни ўзлари сотиб олади ва шундан келиб чиқиб нархларни ўзлари белгилайди.
Савол: ОАВларда бир хил қон босим пасайтирувчи дори воситаларни қабул қилмаслик керак дейилган. Шунинг учун мен шу дориларни ичишни тўхтатган эдим. 1 ҳафтадан бери қон босимим ошиб боряпти. Нима маслаҳат берасизлар?
Жавоб: Пандемия бошланғич даврида 2 та гуруҳ гипотензив дори воситалари бўйича шунга ўхшаган маълумот бор эди.
Лекин бугунги кунда Европа кардиологлар жамияти томонидан айтилган: шифокорлар томонидан тавсия қилган барча қон босимини пасайтирувчи дори воситаларни доимий равишда қабул қилиш керак.
COVID-19 да бу дориларнинг ножўя таъсирлари йўқ.