Аввал хабар қилганимиздек, бугун 25 январ куни Халқаро пресс-клубнинг Ўзбекистон Республикаси Президентнинг Олий Мажлисга йўллаган Мурожаатномасига бағишланган навбатдаги сессияси бўлиб ўтмоқда.

Унда Сенат раисининг биринчи ўринбосари — Содиқ Сафоев, Қонунчилик палатаси Спикерининг биринчи ўринбосари — Акмал Саидов, Молия вазири — Жамшид Қўчқоров, Ташқи ишлар вазири — Абдулазиз Комилов, Адлия вазири — Руслан Давлетовлар иштирок этишмоқда.

Сессияда Ўзбекистон Молия вазири Жамшид Қўчқоров рақамли иқтисодиёт ва инфляция ҳақида ўз фикрларини билдирди:

Рақамли иқтисодиёт бугун миллий иқтисодиётнинг қиёфасини ўзгартиряпти, иқтисодни шаффоф амалга оширишга имкон яратмоқда. Рақамли иқтисодиёт иқтисодда самарадорликни оширади, меҳнат унумдорлиги ортади. Биз ҳужжатларни қоғоздан электрон тизимга олиб чиқамиз.

МАВЗУГА ДОИР: Шавкат Мирзиёев: “Аксарият вазирлик ва идоралар рақамли технологиялардан мутлақо йироқ”

Шунингдек, вазир ЯИМ ва инфляция ҳақида шундай деди:

Биз ЯИМни кўпайтирмасак, одамларни ҳеч қачон бой қила олмаймиз.

2020 йил Инфляция паст бўлишига ваъда бера олмаймиз. Бунинг иложи ҳам йўқ. Айниқса, пахта ва ғаллага давлат закази бекор қилинса, пахта ва ғалла эгаси ярмаркаларда ўз нархини қўяди. Бу эса нарх-наво ўсишига олиб келади.

МАВЗУГА ДОИР: ОТМларга талабаларни қабул қилишда давлат грантлари 2 баробар кўпайтирилади (видео)

Молия вазири Жамшид Қўчқоровга “мурожаатда айтилган грантлар ва қўшимча харажатлар бюджетга зарар бўлмайдими“, деган савол ҳам берилди. Қўчқоров молия вазири сифатида, бу ерда бюджетга юк бўладиган ортиқча харажатларни кўрмаяпман, деди.

Аввалроқ, сессияда Қонунчилик Палатаси Спикерининг биринчи ўринбосари, ҳуқуқшунос олим Акмал Саидовнинг прописка тизими тўғрисидаги фикрларини келтирган эдик.