Молия вазирлиги 2022 йилда тижорат банкларининг ипотека кредитлаш бозоридаги улуши тўғрисида маълумот берди.

Унга кўра 6 ой давомида аҳолига 3,6 трлн сўм миқдорида ипотека кредитлари ажратилган.

Мазкур даврда энг кўп маблағни «Қишлоқ қурилиш банки» ажратган бўлиб, 987 млрд сўмни ташкил этди ва банк кредитлаш бозорининг 27,2%ини эгаллади.

Кейинги ўринларда «Ипотека-банк» ва Ўзмиллийбанк» 890 ва 532 млрд сўм билан жойлашди.

«Халқ банки» ва «ОФБ» эса бозорнинг деярли 8%ини эгаллади. Улар мос равишда 300 млрд сўмга яқин кредит ажратган.

6 июль куни президент бошчилигида ўтказилган йиғилишда ипотека кредитларидан фойдаланиш даражаси кўриб чиқилди.

Хусусан, жорий йилда бюджетда тижорат банкларига 43 мингта уй-жой учун 13 трлн сўм, 29 минг нафар аҳолига субсидия учун 1,2 трлн сўм кўзда тутилган.

Лекин ўтган олти ойда аҳолига бу маблағларнинг фақат 28−30%и берилган.

Шу боис бу борада бюрократияни камайтириш, аҳолига комплекс хизмат кўрсатадиган ипотека марказларини ташкил қилиш бўйича кўрсатмалар берилди.